ودبانقا القبة

الزائر الكريم اهلا ومرحب بيك في منتدي ودبانقا القبة

منتدى عام يهدف لخلق الصلاة الطيبه وتبادل الاراء ويهتم بقضايا المنطقة

الزائر الكريم اهلا ومرحب بكم في منتدي ودبانقا القبة
الي جميع اهلي بود بانقا القبةالحبيبة داخل وخارج الوطن الكبير ندعوكم للتواصل عبر هذا المنتدي تواصلا للاجيال واسترجاعا لسالفات الايام في قريتنا الحبيبة
الاعضاء الكرام تم تشغيل بوابة الدردشه اسفل المنتدي يرجي التسجيل للدخول في الدردشه

    نكات الجزء الاول

    شاطر
    avatar
    mohamed
    المدير العام
    المدير العام

    عدد المساهمات : 9
    تاريخ التسجيل : 27/01/2011
    العمر : 32
    الموقع : http://www.wdbanga.sudanforums.net

    نكات الجزء الاول

    مُساهمة من طرف mohamed في الأحد يناير 30, 2011 11:34 am

    واحدة حنكوشة دخلت مطعم قراصة صاحبو رباطابى .. قالت ليه ياعمو عليك
    الله ادينى سندوتش

    قاليها يابتى عندنا قراصة كان دايرة سندوتش جيبى ابرة
    وخيط

    رباطابي شاف عتود اسود واضنينو بيض قال مالو دا عامل زي
    البنطلون القالبين جيوبو

    الحاجة جات للدكتور الرباطابي في المركز الصحي وقالت
    ليهو

    دايراك تحولني المستشفى عشان هناك بكشفو علي بالسماعة .

    قال ليها نان الشايفاها مدروعة في رقبتي دي قايلاها
    نبلة؟؟

    رباطابي جارو عندو غنماية عايز يبيعا
    بعدين في السوق الغنماية قربت تزوووغ قام رفع ليها ولدا
    عشان تشوفو
    جات راجعه
    والرباطابي مصور الموقف كلة قام قال ليه
    اسمع ياصحبي جبتها بالريمووووووت


    شايقي جاء لرباطابي قال ليه انا بقيت شاعر وقام قرأ ليه
    ما بين الشتاء والفواصل حبك سكن المفاصل
    الرباطابي قال ليه
    انت ما شاعر انت عندك رطوبة امشى اكشف

    رباطابي مره بي جماعه من اهلنا الهدندوة بشربو في قهوة
    وكانوا لابسين لبستم المعروفة الواحد يكون لابس سروال
    طويل
    وباقي جسمو عريان ورابط العمه خلف خلاف
    الرباطابي قاليهميا اخوانا داير لي فنجان جنبنة
    نط واحد من الهدندوة قاليهو ياخي انتو سحارين ما بنديك
    الرباطابي قاليهو عليك الله انت هسي يسحرو ليك شنو زي
    الفانوس القزازتو مكسرة

    في واحد رباطابي جنننننو شراب ..وجارو أنصار سنة ... مشى
    ليهو ينصحوا وشبكو ليك: الخمرة دي بتودر العقل .. الخمرة دي بتعمل ليك تليف في
    الكبد يعني بالعربي كدا الخمر دي يعني ( موت بطيييييء ) ..
    الرباطابي اتلفت وقال ليهو: ( أنا زاتي ما مستعجل )
    !!!!!
    -----------------
    قالوا رباطابي قاعد في مطعم وجنبو زول احوص, الرباطابي
    طالب كباب والجنبو طالب فول, اها قام الجنبو كل شوية ياكل من الكباب بتاعو "نظام
    احوص وكدة". الرباطابي اتغاظ شديد قام قال ليهو : عرفناك ما بتشوف, ما
    بتضوق؟؟؟؟

    واحد قال لرباطابى انتوا عليكم الله عندكم موية ...
    الرباطابى قال ليهو طيب الشجر العندنا داااك قام بالتيمم
    ...

    رباطابى في قربة جارهم تعب شايلنوا مودينو المستشفى ركب
    معاهم فى العربية الرباطابي ساكت ساى بعاين للمريض والمريض ماعاوز يدى اى اقوال
    ولا كلمة اول ماجاء في شارع المطار قامت العربية دقدقت قام المريض قال نحنا وين؟؟
    الرباطابي قال ليهم
    ( زولكم
    يادوب خش الشبكة
    )






    رباطابي عندو اخوانو راقدين في المستشفي الاول موصلين له درب
    والثاني قاعد يرجف من شدة الالم، خالو ضرب ليه ، قال ليه اخوانك كيف ، قال ليو
    واحد شغال هزاز والتاني جاري الشحن ..


    الرباطابي عمل ليه محل فول في البلد ومشى معاه كويس قام
    وسع المحل وعمل قدرة ثانية وزاد عدد الكراسي وبعد فترة جاب ليه ست شاي في المحل
    جاه صاحبه الرباطابي قال ليه يا دكتور عينت ليك (فحيص) معاك ولا شنو!!

    رباطابى عمل شكله بالليل واتفلق ابوهو وداهو للدكتور
    والدكتور كان طالع عاين للولد لقا الجرح كبير
    قال لي ابوهو ولدك دا كان تجيبو بدري
    ابو الولد قال ليهو بدرى كيف يعنى كان اجيبو ليك قبل
    يفلقو

    شايقية ورباطابية راكبات الحافلة ماشات بكا .. الشايقية
    طقطقت للكمساري ونزلت، الرباطابية اتأخرت.. الكمساري قال ليها: نازلة؟ قالت ليه : لا..
    لا.. بدور اقدمها للباب!!

    واحد رباطابي راكب القطر قاعد جنب الشباك ... فطلب منو
    الزول القاعد جنبو : ممكن اقعد جنب الشباك عشان انا بسف السـعوط وبتف ...الربطابي
    رد عليو : نان وانا بسف وببلعو ..

    رباطابى نزل ضيف عند جماعة وكان عندهم تيس فى الزريبة
    جنب الصالون عنده نزلة الليل كله يعطس...الصباح بدرى سيد البيت جا وسال الرباطابى"
    ان شاء الله نمت كويس؟؟ الرباطابى قال ليه
    انوم بى وين لى تيسك ده التقول مكوجى مقابل العيد









    رباطابي في عزومة عرس لاحظ انو في زول نائم نومة عميقة جدا ... بس
    في اللحظة الختو صينية الاكل عمك تترب صحي وابتداء يلقلق ... الرباطابي قال ليهم :
    انتو زولكم دا كانتو خاتنو في الشاحن ...



    رباطابي مشى لواحد بعمل في لقيمات في المحطة داك كلما
    يخت الصاج في الكانون الصاج يميل لي جمبه الرباطابي قال ليه بتظبتوا في الدش عايز
    تجيب ياتوا قناة فضائية؟
    صاحبنا لمن رمى العجينة في الصاج والزيت كان سخن العجينة
    بعد ما نزلت في آخر الصاج عملت صوت (تششش) الرباطابي قال ليه اكيد دي قناة الجزيرة
    زولنا طوالي طفى الصاج ومشى بيتهم.

    رباطابية بتبيع زلابية وطعمية للركاب في محطة ابوحمد
    بعدين الايام ديك شغلو القطر الاكسبرس وكان ما بيقيف في اي محطة المهم القطر جا
    ماشي فيها فووووو وماباعت اي حاجة وقامت رجعت البيت قام راجلها قال ليها انشاء
    الله بعتي كويس الليلة؟؟
    قالت ليهو- ابيع كيف والقطر جا ماشي فيني زي ترجمة الفلم
    الاجنبي

    ربـاطابي بنـته امتحـنت من مدرسـة خـاصة ورسبـت
    المـدير قاليهو: الفـصل فيهو 50 بـنت ونـجحت واحـدة بـس
    الرباطابي قال ليه
    يا أخيـنا انت فاتـح فـصل ولا كرتـلة؟






    رباطابي عسكري مرور .. بلغوه أنو في باص إنقلب .. مشى مكان الحادث لقى
    الناس كلها ميتين ماعدا واحد .. قال ليهو : أها يالصـــــندوق الأســـــود ..
    الحادث حصل كيف ..


    رباطابي راكب القطر بتاع الشمالية ...وعشان مافي نور عفص رجل واحد
    جنوبي ... الجنوبي بي زهج قال ليو : انت عميان ولا شنو تطلع في كراع بتاع الناس
    انت ما عارف زاتو ماشي وين...الرباطابي رد عليه : انا ماشي عند اهلي انت ماشى وين
    ..



    رباطابي لابس جزمة قديمة أصابعينو الخمسة مارقين بره. مشى لبتاع
    ورنيش مد ليهو كراعو.

    بتاع الورنيش قال ليهو: أورنش ليك؟ قال ليه : لا لا..
    طقطقم لي!!


    حمار اتعود يحك راسو بشباك فصل في مدرسة .. الاستاذ قال لي الطلبة:
    الحمار ده كل يوم بعمل كده عندو ود عم هنا ولا شنو؟

    رد عليهو تلميذ رباطابي: والله ما بجي إلا في حصتك يا
    أستاذ..!!


    رباطابي جزار جاو واحد قال ليهو عايز راس نيفة بس صلحو كويس
    قال ليه اصلحو كيف يعني البسو نضارة


    رباطابي ببيع لبن المهم عندو زبون محامي مرتو غالطت الرباطابي في حق
    يومين بحجة انو كان في مطرة والرباطابي مصر انو اداهم اللبن في اليوم البعدو جا
    زوجها المحامي وقال ليهو انحنا ماممكن تغالطنا ابدا

    الرباطابي قال ليه اغالطك كيف وانت الغلاط فاتح ليه مكتب






    رباطاب عندهم بنطون عطلان وقاعدين طول النهار بيعافروا عشان يطلعو
    البنطون من البحرعشان يصلحو.. جا واحد جعلي قال ليهم: انتو البنطون دا مطلعنوا من
    البحر ليه؟

    رد عليه واحد منهم: والله البحر ما نفع معاهو قلنا نجرب
    الظلط..


    رباطابي بتاع فرن جاءهو واحد قال ليهو العيش في النار رد ليهولا يااخوي
    في الجنة ..


    رباطابي
    جاهو شايقي من السفر قال ليه ارح وريني قبر امي الرباطابي مشى معاهو المقابر وقال
    للشايقي اها ده قبر امك

    الشايقي
    قال ليه حددو لي بالضبط ياخي ده ولا ده؟؟

    الرباطابي
    قال ليه يا زول شيل فاتحتك ساي
    ..اصلك انت
    داير تديها مصاريف؟؟


    واحد عندو كميه من الجمال داير يقطعا البحر وخايف من عين الرباطاب
    صاحبك اتوكل وركبها البنطون وكلها كانت باركه اول
    البنطون ما وصل القيف فى جمل وقف على طولو
    واحد من الرباطاب قال ليهو اتا جملك دا فايتاهو ركعه ولا
    شنو


    قال ليك في عطبرة في رباطابي عنده عجلة عايز يدّخلها حوش الشركة يوقفها
    هناك قام الغفير قال ليهو لا ممنوع. الرباطابي زعل وشاف

    عجلة واقفة جوة قام قال للغفير ما هاديك عجلة واقفة، رد
    الغفير وقال
    ليهو دي حقـّت المدير. قام الرباطابي قال ليهو: نان
    اللتي دي بتبعّر






    رباطابى صلى الجمعة فى مسجد أنصار السنة الإمام قال السلام عليكم مد
    يدو للزول الفى يمينو قال ليهو: تقبل الله أنصارالسنة رفض يمد يدو و قال ليهو : دى
    ماورد فيها نص، الرباطابى قال ليهو : نان الإحراج ورد فيهو نص؟؟


    الرباطابى والجعلى مسافرين سوا الموية العندهم كملت قوم يالجعلى انزل
    فى الواطة حفر، الرباطابى مشى جاب ليهو سعف وقعد يضفر فيهو اها الجعلى كمل الحفر
    والموية مرقت صاحبنا الرباطابى نزل جردلو فى البير، الجعلى طب مسك ايدو، الرباطابى
    قال ليهو : هسى ايدى مسكتها وجردلي حميتنى انزلو ، دحين بيرك دى الا كان تتكيها!!!


    واحد رباطابى معزوم عشاء مع واحد صاحبو مشى لقى الكهرباء قاطعة قعدو
    يتونسو مسافة الرباطابى جاع جوعه شديدة قال لى صاحبو ياخى الزمن فات وانا جيعان
    ياخى طلع لينا العشاء دا، صاحبو قال لية ياخى العشاء ما بطلع الا الكهرباء تجى....
    الرباطابى قال لى اصلو دا عشاء ولا شريط فيديو!!


    شافعة رباطابية قاعدة تاكل مع أبوها في الصينية ، قالت ليهو:
    يابا أدني عيشة، أبوها حب يشاغلها، قال ليها بتدوري بيها شنو؟؟ قالت ليهو بدور
    أرضعها!!!


    في الرباطاب جابو ليهم استاذ دنقلاوي وفي اول يوم عايز يستفز الطلبة
    فكتب في السبورة جاءت محمد و قال للطلبه اعربوها فرد ليهو واحد شافع: جاء فعل ماضي
    ناقص، التاء تاء الدناقله، محمد فاعل
    .





    _________________
    محمد
    M4
    avatar
    boooody
    عضو متميز
    عضو متميز

    عدد المساهمات : 34
    تاريخ التسجيل : 28/01/2011
    العمر : 29

    ههههههههههههههههههههههههههههههههههههههه

    مُساهمة من طرف boooody في الثلاثاء فبراير 01, 2011 3:01 pm

    شكر كتير يامحمد ونتمنا مزيد من النجاح والتقدم lol!

    مني حسب الرسول خليفة

    عدد المساهمات : 4
    تاريخ التسجيل : 25/03/2012

    رد: نكات الجزء الاول

    مُساهمة من طرف مني حسب الرسول خليفة في السبت أبريل 07, 2012 10:46 am

    واحد شايقى قال لمرته : لما أموت إتزوجى جارنا المحسى دا ..قالت ليهوا ...

    ليــه ؟ قاليها : لأنو غشانى باع لى تلاجة بايظى وعاوز أتسدّ
    avatar
    بت الشمبلى
    مشرف
    مشرف

    عدد المساهمات : 52
    تاريخ التسجيل : 10/08/2011
    العمر : 41
    الموقع : ااخرطوم بحرى الكدرو

    رد: نكات الجزء الاول

    مُساهمة من طرف بت الشمبلى في الأحد أكتوبر 07, 2012 7:00 am

    ههههههههههههههههههههههههههههه

    والله زمن طويل جدا ما ضحكتا بى الصورة دى

    وياريت تواصل على الاقل نمرق من الزهج الكتلنا والظروف الطلعت زيتنا

    ودمت مع اعتزازى

      الوقت/التاريخ الآن هو الثلاثاء ديسمبر 12, 2017 3:28 am