مسدار الحبيب

فى فصل الخريف يا ربى كيف العودة
لام قلبا شفيف كل الطرق مسدودة
يا قلبى العفيف دايما وقعتك سودة
روح لا تقيف الحب طريقته وحيدة
شد سرج الغرام و اركب خيول الريدة

الظبى المدرب على السماح و العفة
ساب زولا تغرب أوب تغابى العرفة
يا أب طبعا مشرب بالسماح و العفة
جيب شايا مكرب بالهبهان و القرفة
واقعد جنبى قرب و افتح قليبك ضلفة

يا الزول البعيد سيد المقام العالى
كالظبى الشريد تايه و ماك مبالى
ارجع لى عود رجع لى كل امالى
أتعبنى الصدود يا ريته حالك حالى

يا السمحة ام رسن ست الجمال الصافى
انا قلبى اتوهن و ات ماك دواى الشافى
ان طال جفاك على بشكيك (للمتعافى)
و ان مت فى دربك و الله منك عافى

بعينى شفتو يميس الحور فريع البانه
عشمان عشم عشم إبليس القال يزور بستانه
لو حتى أبقى فطيس حرم أموت فى شانه
عطرك سوار باريس خلى العرب رطانه!

يا أب حسنا تمادى طامح بعيد غاياته
لوح لى نادى و اسلمنى كل راياته
يا قلبى المتيم سعدك دنت ساعاته
غيما فيك خيم أحيا القليب و مواته

البدر اكتمل و دنينا نلنا أملنا
سرح سودان قفل رسم الحرير بالحنة
أوه قلبى و جفل يوم مال على وحن
ضوقنى العسل فى النار دخلت الجنة!